Mercadonak Jundizko gune estrategikoaren aldeko apustua areagotu du, eta instalazioak handitu ditu 18.000 m2-ko beste partzela batekin. 2020an, elikaduraren erraldoi horrek Jundizko zentro logistiko adimenduna amaitu zuen. Enpresa horretako handiena da penintsulako iparraldean, 150.000 m2-ko lursailarekin eta 187 milioi euro baino gehiagoko inbertsioarekin, eta 773 lanpostu ditu. Jarduera handia eta hazteko aukerak direla-eta, beharrezkoa da instalazioak handitzea, zentro logistikoa amaitu eta bi urte besterik igaro ez diren honetan.

Era berean, Eroskik Jundizen aurkitu du produktu freskoak banatzeko plataforma berria, 17.600 m2 erabat hoztuta ditu, 150 langile enplegatzen ditu eta 20 milioi euroko inbertsioa egin du.

Jundizetik oso gertu, Iruña Okako Los Llanos 2 Enpresa Parkean, Lidlek 111.000 metro karratutik gorako lursail batean finkatu du bere zentro logistikoa, 75 milioi euro inguruko inbertsioa izan duena, eta 200 pertsona enplegatzen ditu.

Elikaduraren arloko lider horien artean, Arabatik Espainia iparraldeko bostehun supermerkatu baino gehiago hornitzen dira.

Bestalde, Panattoni enpresak Jundiz aukeratu du, lehiarako dituen abantailengatik, azken miliako banaketa egiteko plataforma logistiko egokia garatzeko (33.000 m2), azken belaunaldiko nabeekin, eraikuntza jasangarriko ziurtagiriak dituztenak eta emisio txikiko eremuetan jarduteko banaketa elektrikoko flotak hartzeko aukera ematen dutenak. Panattoni Development Spain, konpainia bultzatzailea, Estatu Batuetako gainazal industrial eta logistikoen sustatzaile handienetako baten filiala da.